Wednesday 3 September 2014

සුරැකෙන හිමිකම කුමක්ද?

මානවයා යනු මම නොවේ අපිය.

මම ගැන පමණක් සිතන විට ඇති බොහෝ දේ අපි ගැන සිතන විට නැති බව පෙනේ. බොහෝ දේ ඇති අය ගැන සිතන විට, ඒ අය අපි අතර නැති බව සිතේ. බොහෝ දේ ඇති අයත්, බොහෝ දේ නැති අයත් මමත් සියල්ලෝම අපි වන්නේ කවදාදැයි සිතමින් සිටිද්දී, මෙලෙස අපට නොමැති දේ ගැන කියැවුන තැන් ගැන සොයා බලන්නට සිතුනි.
http://ozziesaffa.blogspot.com/2013/07/uk-calls-grow-to-boycott-toxic-human.html

මානව අයිතිවාසිකම් යනු ‘මිනිසාට තම සමාජ ජීවිතය යහපත් ආකාරයෙන් පවත්වාගෙන යෑමට අවශ්‍යවන කොන්දේසි’ ලෙස නිර්වචනය කළ හැකිය. බ්‍රිතාන්‍යය 1215 දී ප්‍රකාශයට පත් කළ ‘මහා අධිකාර පත්‍රය’ (Magna Carta) හා 1688 දී ප්‍රකාශයට පත් කළ ‘අයිතිවාසිකම් පනත’ (Bill of Rights) ද, 1776 දී සකස් කළ ඇමෙරිකා එක්සත් ජනපදයේ ස්වාධීනතා ප්‍රකාශය (Declaration of Independence of the USA) ද, 1789 දී ප්‍රශයේදී එළි දැක්වූ ‘මිනිසා සහ ප්‍රංශ පුරවැසියන්ගේ අයිතිවාසිකම් ප්‍රකාශය’ (Declaration of the rights of the man & the citizen in France) ද මානව අයිතිවාසිකම් මෑත ඉතිහාසයේ සැලකිල්ලට භාජනය කළ ලේඛන ලෙස සැලකිය හැකිය. පුරාතන අතීතයේ ලොව පහල වූ ගෞතම බුදුරජානන්වහන්සේ ප්‍රමුඛ ශාස්ත්‍රෑන්වහන්සේලා විසන් දේශනා කර ඇත්තේද මානව ආයිතිවාසිකම් සුරුකෙන සමාජයක ජීවත් වනනේ කෙස්ද යන වගයි.

1945 දී එක්සත් ජාතීන්ගේ ප්‍රඥප්තිය (United Nations Charter) තුළින් මානව අයිතිවාසිකම් පිළිබඳව එකඟතාවයක් තිබිය යුතු තීරණය කරන ලදී. ඒ අනුව 1948 දෙසැම්බර් 19 වෙනිදා මානව අයිතිවාසිකම් පිළිබඳ විශ්ව ප්‍රකාශය එළිදක්වන ලදී.


එම ප්‍රකාශයේ දැක්වෙන පරිදි මානව අයිතිවාසිකම් කිහිපයක් මෙසේය.

  1. සියලුම මිනිසුන් නිදහස්ව උපන්නාහ. ගරුත්වය හා අයිතිවාසකම් අතින් සමානය. සිහිබුද්ධියෙන් හා යුතු-අයුතුකම් විසඳීමේ හැකියාවෙන් යුක්තය. එහෙයින් එකිනෙකා කෙරෙහි සහෝදර හැඟීමෙන් ක්‍රියා කළ යුත්තෝ වෙති.
  2. ජාති, වර්ණ, ලිංඟ, භාෂා, ආගම්, දේශපාලන මත, අන් මතිමතාන්තර, සමාජික ප්‍රභවය, දේපොළ, උපත හෝ වෙනත් තරාතිරම් ආදී කිසිම හේතුවක් නිසා වෙනසක් හෝ භේදයක් නැතිව සෑම දෙනාටම, මෙම ප්‍රකාශනයේ කියවෙන සෑම අයිතිවාසිකමක්ම සමානව භුක්ති විඳීමේ අවස්ථාව හිමි වන්නේය.
  3. ප්‍රාණයට, නිදහස්ව හැසිරීමට හා පෞද්ගලික ආරක්‍ෂාවට හිමිකම් ඇත්තේය.
  4. වහල්භාවයට පත් නොවීමට හිමිකම් ඇත්තේය.
  5. වධයකට, කුරුරි අමානුෂික දඬුවමකට, හිරිහැරයකට, නින්දාවකට පත් නොවීමට හිමිකම් ඇත්තේය.
  6. නීතිය හමුවේ පුද්ගලයෙක් ලෙස සමානව සැලකුම් ලැබීමට හිමිකම් ඇත්තේය.
  7. නීතියේ රැකවරණය සමානව ලැබීමට හා වෙනස්කම්වලට භාජනය නොවීමට හිමිකම් ඇත්තේය.
  8. අයිතිවාසිකම් කඩවීම ගැන නිසි බලය ඇති අධිකරණයකින් යුක්තිය ඉටුකරවා ගැනීමට හිමිකම් ඇත්තේය.
  9. අත්තනොමතිකව අත්අඩංගුවට ගැනීමකට, රඳවා තබා ගැනීමකට හෝ පිටුවහල් කිරීමට ගොදුරු නොවීමට හිමිකම් ඇත්තේය.
  10. ස්වාධීන අධිකරණයකින් සාධාරන හා විවෘත නඩු තීන්දුවක් ලැබීමට හිමිකම් ඇත්තේය.
  11. නිර්දෝෂී බවට පූර්ව නිගමනය කරනු ලැබීමට හා අතීතයට බලපාන දණ්ඩන නීතිවලින් ආරක්‍ෂා වීමට හිමිකම් ඇත්තේය.
  12. පෞද්ගලිකත්වයට හිමිකම් ඇත්තේය.
  13. රටෙහි වාසයට, රට තුළ ගමනාගමනයට, රට හැර යාමට හා පෙරළා පැමිණීමට හිමිකම් ඇත්තේය.
  14. වධබන්ධනවලින් මිදීම පිණිස පිටරටක රැකවරණය සෙවීමට හිමිකම් ඇත්තේය.
  15. ජාතිකතවයට හා ජාතිකත්වය වෙනස් කිරීමට හිමිකම් ඇත්තේය.
  16. පූර්ණ වයසට පත් වූ විට සීමාවකින් තොරව විවාහයට ඇතුළත් වීමට, විවාහයට ඇතුළත් වීමේදී, පවත්වාගෙන යාමේදී හා අවසන් කිරීමේදී සමාන අයිතවාසිකම් ලැබීමට, එම පවුල, සමාජය හා රජය විසින් ආරක්‍ෂා කරනු ලැබීමට හිමිකම් ඇත්තේය.
  17. තනිව හෝ හවුලේ දේපොළ අයිතිකර ගැනීමට හා අත්තනෝමතිකව දේපොළ අහිමිකර නොගැනීමට හිමිකම් ඇත්තේය.
  18. නිදහසේ සිතීමට, ආගම ඇදහීමට, තනිව හෝ සාමූහිකව ආගම ඉගෙනීමට හා පුදසිරිත් පැවැත් වීමට, ආගම ප්‍රකාශ කිරීමට හිමිකම් ඇත්තේය.
  19. මතයක් දැරීමට හා එය ප්‍රකාශ කිරීමට, තොරතුරු හා අදහස් සෙවීමට, ලබා ගැනීමට, අනුන්ට දැන්වීමට හිමිකම් ඇත්තේය.
  20. සාමකාමීව එක්රැස් වීමට හා සමිති-සංවිධාන පැවැත්වීමට හිමිකම් ඇත්තේය.
  21. රාජ්‍ය පාලනයට සහභාගි වීමට, රාජ්‍ය සේවයේ යෙදීමට, පොදු ජන කැමැත්ත නිදහස් ඡන්ද විමසීම මගින් ප්‍රකාශ කරනු ලැබීමට හිමිකම් ඇත්තේය.
  22. සමාජ ආරක්‍ෂාව ලැබීමට, ආර්ථික අයිතාවාසිකම්, සමාජ අයිතිවාසිකම් හා සංස්කෘතික අයිතිවාසිකම් මුදුන්පත් කරවා ගැනීමට හිමිකම් ඇත්තේය.
  23. කැමති රැකියාවක් කිරීමට, ඊට සාධාරණ සමාන වැටුපක් ලැබීමට, වෘත්තීය සමිති පිහිටුවීමට හා වෘත්තීය සමිතිවලට බැඳීමට හිමිකම් ඇත්තේය.
  24. වැඩ කරන පැය ගණන ගැන සාධාරණ සීමාවක් ලැබීමට, වැටුප් සහිත කාලීන විරාමයන්/විවේකයන් ලැබීමට හිමිකම් ඇත්තේය.
  25. ආහාර, ඇඳුම්, නිවාස, වෛද්‍ය ආරක්‍ෂාව, සමාජ සේවාවන්ගෙන් ලැබෙන සමාජ ආරක්‍ෂණය ලැබීමට (විවාහජ හා අවිවාහජ සැමට) හිමිකම් ඇත්තේය.
  26. අනිවාර්ය ප්‍රාථමික අධ්‍යාපනය ලැබීමට, පාසල් අධ්‍යාපනය, කාර්මික හෝ වෘත්තීය අධ්‍යාපනය හා යෝග්‍යතාවය අනුව උසස් අධ්‍යාපනය ලැබීමට හිමිකම් ඇත්තේය.
  27. සංස්කෘතික ක්‍රියාවන්හි හා විද්‍යාත්මක ක්‍රියාවන්හි නිරත වීමට, ඒවායේ ඵල ප්‍රයෝජන ලැබීමට හා තම නිර්මාණවල ද්‍රව්‍යමය හා සදාචාරමය ප්‍රයෝජන ලැබීමට හිමිකම් ඇත්තේය.
  28. මානව අයිතිවාසිකම් ආරක්‍ෂා කරවා ගැනීමට හැකි ජාත්‍යන්තර සංවිධාන රටාවක ජීවත් වීමට හිමිකම් ඇත්තේය.
  29. අයිතිවාසිකම්වල සීමාවන් ඇතුළත සමාජයේ යුතුකම ඉටුකරවා ගැනීමට හිමිකම් ඇත්තේය.
  30. කිසියම් පුද්ගලයෙකු හෝ සමූහයක් හෝ රජයක් හෝ මෙම අයිතිවාසිකම් උල්ලංඝනය වන අයුරින් අර්ථ ගැන්වීමෙන් වලක්වා තබා ගැනීමට හිමිකම් ඇත්තේය. 

Thursday 21 August 2014

පරිගණකයටත් ඉබෝලා වෛරසය - පියවරෙන් පියවර

පළමු ජවනිකාව෴

ඉබෝලා වේගෙයෙන් පැතිරෙ‍මින් පවතී. ඇත්තෙන්ම සිදුවන්නේ රෝගය පැතිරෙනවාට වැඩි වේගයෙන් භය පැතිරීමයි. රෝගය පිළිබඳව පැතිරෙන (දුර්)මතද බහුලය. එක් මතයක් ‘දුර්-මතයක්’ (Misconception) වෙද්දී ඊට ප්‍රතිවිරුද්ධ මත ‘හරි-මතය’ (Perception) වේ. ඉබෝලා අප්‍රිකානු වනාන්තර ආශ්‍රිත චිම්පන්සියන්, වඳුරන්, පළතුරු වවුලන් වැනි ක්‍ෂීරපායි සතුන් මගින් මානවයා වෙත ආ බව එක් මතයකි. අභ්‍යාවකාශයේ සරන ධූම කේතු, ධූලී වලා ආදියෙන් නිරන්තරයෙන් පොළොවට ඇද හැලෙනා විෂකාරක නිසා ඇති වූ බව තවත් මතයකි. ඇමෙරිකාව හෝ වෙනත් නම නොදන්නා එවැනි රටක සිදු කළ පර්යේෂණයක අතුරු ප්‍රතිපලයක් නිසා ඉබෝලා ලොවට දායාද වූ බව තවත් මතයකි. එවැනි රටක් හිතා-මතාම මෙය නිර්මාණය කොට දුප්පත් අප්‍රිකානු රටවලට බෙදා හැරි බව තවත් මතයකි. මින් නිවැරදි කුමක්දැයි නොදන්න නිසා දුර්-මත කුමක්දැයි පැහැදිලිවම කිව නොහැක. හේතුව කුමක් වුවත් මෙම රෝගයට නිසි ප්‍රතිකර්ම සොයා බැලීමේ පර්යේෂණ සිදු වන බව දුර්මතයක් වන්නේ, ඉහත සඳහන් කළ එක් කරුණක් සත්‍ය වුවහොත් පමණි. වඩාත් නිවැරදිව කියතොත්, ඉහත සඳහන් කළ එක්තරා මතයක් නිවැරදි නම්, ප්‍රතිකර්ම සොයා ගැනීම සඳහා පර්යේෂණ තවමත් සිදුකෙරෙනවා යන්න දුර්-මතයක්ම විය යුතුය. එනම්, ඇමෙරිකාව හෝ නම නොදන්නා වෙනත් රටක් (ආයතනයක්) විසින් හිතා-මතාම ඉබෝලා වෛරසය නිපදවූයේ නම් ඒ සමගම ප්‍රතිකර්මද නිපදවා තිබිය යුතුමය. ලයිබීරියාවේ සුව-සහන සේවයේ යෙදුනු, ඇමෙරිකානු ජාතික වෛද්‍ය කෙන්ට් බ්‍රැන්ට්ලි හා නැන්සි විට්‍රබෝල් පර්යේෂණාගාර මීයන් ද නැතහොත් ‘ඉ‍බෝලා ප්‍රතිකාර සේවාව’ සුභ මොහොතින් විවෘත කළ ආරාධිත අමුත්තන්ද යන වග තීරණය වන්නේ ‘නිවැරදි දුර්-මතය’ හඳුනා ගත් දාටය.

දෙවන ජවනිකාව෴

ඉබෝලා වේවා, ඒඩ්ස් වේවා, වෙනත් ඕනෑම රෝගයක් වේවා ඊට, අලුතින් ප්‍රතිකර්මයක් සොයා යාමේදී, පර්යේෂණාගාර මීයන්ට අමතරව ස්වේච්ඡාවෙන් ඉදිරිපත්වන ‘බිලි-බෝයිලා’ කිහිප දෙනෙකුද අවශ්‍යම වන්නේය. නිර්මාණ කරුවන්ගේ දක්‍ෂතාවය සේම බිලි-බෝයිලාගේ වාසනාව අනුව ඔවුන්ට සිදුවන හානිය අවම ‍වන්නට හැකි වුවද, සිදුවිය හැකි නරකම දෙය පවා සිදු වීමේ අවස්ථා එමටය. අප්‍රමාණ වූ ‘අනෙකුන්’ වෙනුවෙන් ස්වේච්ඡාවෙන් ඉදිරිපත් වන මෙම උත්තම මිනිසුන්ට ‘බිලි-බෝයිලා’ ලෙස ඇමතීම පවා නොවටින්නේය. එසේම ඔවුන් කළ කැප කිරීම වෙනුවෙන් ඔවුන්ට නොදිය හැකි දෙයක් නොමැති තරම්ය. එහෙත් නොදිය යුතු දේද ඇත්තේය. වැඩිදුර පැහැදිලි කර ගැනීම පිණිස නිදසුනක් සලකා බලමු. පර්යේෂණාත්මක ප්‍රතිකර්මය ලබා දී පැය 24කට පසුව නිරාහාර ලේ සාම්පලයක් ලබා ගත යුතු අවස්ථාවක, කුස ගින්න හොඳින් දැන දැනත් ඔහුට ආහාර ලබා දීමට නොහැකිය. මෙම නිදසුන සරල හා විලක්ප මාර්ග වලින් නිශේධනය කළ හැකි එකක් වුවන්, මෙවැනි අවස්ථා තිබිය හැකි බවට එකඟ වීමට තරම් ප්‍රමාණවත් වනු ඇත.
පින්තූරය අන්තර්ජාලයෙන්. http://en.wikipedia.org/wiki/Laboratory_rat#mediaviewer/File:Cut_Rat.jpg

තෙවන ජවනිකාව෴

‘බිලි-බෝයිලා’ හමු වන්නේ ලොව ප්‍රබලම ව්‍යාපාර දෙකෙන් එකක් වන ‘‍‍ඔෟෂධ’ ව්‍යාපාරයේ දී පමණක්ම නොවේ. තවත් බොහෝ ව්‍යාපාරවල නොහොත් කර්මාන්තවල නව නිර්මාණ බිහි කිරිමේදී බිලි-බෝයි සහයෝගය අවශ්‍ය වේ. ‘නියමු ආයතන’ ලෙස වඩාත් සිත් ගන්නා ලෙස හඳුන්වන්නේ මෙම බිලි-බෝයිවරුන්ය. වඩාත් තේරුම් ගැනීමට නැවතත් නිදසුනක් සලකා බැලුවහොත්, පසුගිය දිනවල ලංකාවේ ‘ගෘහාශ්‍රිත සංචාරක’ කර්මාන්තය ක්‍රියාත්මක කිරීමේ සක්‍යතාවය පරීක්‍ෂා කිරීම සඳහා බිලි-බෝයිවරුන් කිහිප දෙනෙක් ස්වේච්ඡාවෙන් ඉදිරිපත් වූහ. ඔවුන්ගේ ඉදිරිපත් වීම හා කැප කිරීම වෙනුවෙන් ඔවුන්ට යම් යම් ප්‍රතිලාභ හිමි වුවත් එම ව්‍යාපාරයේ සාර්ථකත්වය මෙම බිලි-බෝයිවරුන්ගේ වර්තමාණ තත්වයෙන් ම තේරුම් ගත හැකියි.

සිව්වන ජවනිකාව෴

තොරතුරු හා සන්නිවේද තාක්‍ෂණ කර්මාන්තයේ ද මෙම නියමු වැඩසටහන් එමට දක්නට ඇත. කිසියම් කාර්යයක් සඳහා තොරතුරු හා සන්නිවේදන තාක්‍ෂණය යොදා ගැනීම පිණිස පරිගණක වැඩසටහන් නිර්මාණය කිරීමේදී එම පද්ධතියේ ක්‍රියාකාරිත්වය සැබෑ තත්ත්ව යටතේ පරීක්‍ෂා කර බැලීම සඳහා යොදා ගන්නේ නියමු ආයතනය. නුහුරු-නුපුරදු දෙයක් භාවිතා කිරීමේ අපහසුතාවයට අමතරව නව පද්ධතිය අසාර්ථක වීම හේතුවෙන් ‘අල්ලපු අත්ත හා පය ගහපු අත්ත’ යන දෙකම නැතුව යාමේ අවදානමට පවා මුහුණ දීමට මෙම නියමු ආයතන වලට සිදු වේ. එබැවින් ඔවුන් පිළිබඳව නිරන්තරයෙන් අවධානයෙන් සිටිමින් උපරිම සාධාරණයක් ඉටු කිරීම, අදාල ව්‍යාපෘතියේ අයිති කරුවන්ගේ වගකීම හා යුතුකම වන්නේ.

පස්වන ජවනිකාව෴


ඉහත ජවනිකා සියල්ල එකට ගෙන සලකා බැලීමේදී පෙනී යන්නේ හෝ අවාසනාවට පෙනී නොගියත් තේරුම් ගත යුත්තේ, බිලි-බෝයිලා කෙතරම් අහිංසක වුවත්, එසේම ඔවුන්ට උපරිමයෙන් සැලකිය යුතු වුවත් ප්‍රමුඛ පරමාර්ථය වූ ව්‍යාපෘතියේ අවසාන ප්‍රතිඵලයට අහිතකර ලෙස බලපානු ලබන අවස්ථාවන් නම් කෙසේවත් ලබා නොදිය යුතු බවයි. එසේ වුවහොත් අවාසනාවන්ත වන්නේ බිලි-බෝයි නොව අදාල ව්‍යාපෘතියේ අයිතිකරුය.